Во Паркот на книгите пред книжарницата „Матица ексклузив“ во Скопје денеска во 18 часот ќе бидат преставени животот и делото на првата словенечка писателка, поетеса и композиторка Јосипина Турнограјска. За нејзиното творештво ќе зборува д-р Мира Делавец Тоухами. Таа ќе зборува за улогата и значењето на Турнограјска за словенечката книжевност и ќе изведе делови од монодрама.
Јосипина Урбанчич (9 јули 1833 – 1 јуни 1854 година), била една од првите словенечки писателки, поетеси и композиторки. Родена во замокот Турн во Преддвор во тогашното Австриско царство, денешна Словенија. Оттаму го извела и својот псевдоним Турнограјска (од замокот Турн).
Имала широко познавање на словенечката и европска литература и била одушевена од поезијата на Франце Прешерен. Во нејзиниот краток творечки живот, Турнограјска напишала триесетина раскази, првиот кога имала само 17 години. Својата инспирација ја црпела од историја на Словените и други словенски народи и од популарните легенди. Во 1850 година се свршила со поетот Ловро Томан, поет, кој ќе стане успешен адвокат и влијателен политичар. Поради работата на Томан се преселиле трајно во Грац во 1853 година. Една година подоцна Јосипина починала од компликации при породување предизвикани од сипаници. Имала само 21 година.
