Реконструкцијата на кумановскиот театар ќе оди до недоглед со ова темпо на финансирање, се жалат актерите

Министерството за култура во буџетото за инвестиции ќе одвои 3.2 милиони денари за продолжувањето на реконструкцијата на театарот, што е помалку од една четвртина од поддршката што ја имаа лани  Нам, на актерите на театарот во Куманово, ни е најважно што побрзо да се вратиме во нашата зграда во услови соодветни за работа, велат актерите кои се во недоимица што се случува со реновирањето на нивниот објект, кој пред Нова година запре. Кумановскиот ансамбл веќе две години е сместен во Центарот за култура, додека да заврши големата реконструкција на дотраениот објект, што започна 2020 година. Откако минатата година заврши втората фаза на реконструкција, трет месец не се изведуваат никакви градежни активности.

– Сакаме да укажеме на итноста да не се одложува реконструкцијата на нашиот театар до недоглед. Сметаме дека Министерството за култура е запознаено со нашиот комплексен проблем од кој зависи животот и иднината на Театар Куманово и бараме сериозно разгледување на ситуацијатата и објаснување зошто оваа година не сме во приоритетни инвестиции, како и одговори на прашањето какви се плановите за нашиот театар? Театар Куманово сепак е национална институција која се занимава со продукција на култура и како таква има право да работи и да се развива во нормална и здрава средина, рамо до рамо со другите државни театри во земјава, а Министерство за култура има обврска да ги обезбеди условите во кои истиот непречено ќе работи – велат актерите од театарот. Од ресорното министерство објаснуваат дека за одржување на континуитетот на процесот на реконструкцијата на објектот на театарот во 2023 година, во Програмата за инвестиции се обезбедени 3,2 милиони денари. Лани министерство дало 14 милиони денари за втората фаза на реконструкцијата. -Во услови на економска и енергетска криза, со големи напори на Владата, буџетот за културата за 2023 година, врз реални основи, беше структуриран на 61,6 милиони евра. Реалните околности не` принудија на структурни измени во самиот буџет. Во таа смисла е и распределбата на средствата во сите дејности од културата, како и за инвестициите – велат од Министерството. Оттаму не добивме одговор кога ќе продолжат градежните зафати. Кети Дончевска Илиќ, уметнички раководител на театарот е категорична дека со ваква динамика на реконструкција, никој не знае кога ќе се вратат на својата сцена.

– Ние актерите сме во недоумица. Нам не ни е местото во Центарот за култура, таму не се соодветни условите за функционирање на театарски ансамбл и играње претстави. Има и проблем со греењето и нема континуитет во играње репертоар. Во година кога театарот ни одбележува 75 години од основањето ние сме никаде. Нам ни е најважно што побргу да се вратиме во театар, а тоа не е на повидок со ваков интензитет на пуштање пари. Нашето прашање е: Има ли Министерството за култура план за тоа кога ќе се заврши со реконструкцијата и театарот ќе биде подготвен да се вратиме во него. Ваквата неизвесност на која сме изложени едноставно е на штета на театарската уметност во Куманово – смета Дончевска-Илиќ.

Кети Дончевска-Илиќ

И директорот на Центарот за култура Сашо Тодоровски смета дека реконструкцијата треба да оди со позабрзано темпо, зашто на градот му треба театарската зграда и ансамблот тоа го заслужува. – Ако некој сака, јас сум прв, зашто бев главен иницијатор за да започне реконструкцијата воопшто. Стануваз зобр за реконструкција на стар објект и адаптација и ако се обезбедат повеќе финансии, може да се направат и изведат и две фази. Цела реконструкција е планирана во шест фази. Излегуваат и непредвидени работи кои се решаваат тековно и тоа знае да го успори процесот – вели Тодоровски.

Кумановскот ансамбл во февруари изразија јавен револт поради стопирањето на процесот на реконструкција на театарот, што започна во 2020 година. -Досега работата течеше непречено и успешно се заврши со втората фаза која вклучуваше поставување нова електрична инсталација и водоводна мрежа, по што треба да започне третата фаза која вклучува целосно реновирање на кровната конструкција со вметнување на дополнителен светлосен мост. Што значи стопирањето на процесот сега за нас? Зошто е важно, сега повеќе од било кога Театар Куманово што поскоро да добие своја театарска зграда? Пред самиот почеток на нужната реконструкција, зградата на театарот беше во целосен распад – огромни дупки на кровот, промаја, распаднати ѕидови, влага, нефункционално затоплување, проблеми со глувци, дотраени чиги, стара технологија, единствена просторија за гримиорна и читачки проби без прозори и проветрување, небезбедна сцена, скршени столици во гледалиштето итн. Значи, зборуваме за немање не нормални, туку елементарни услови за работа – велат од ансамблот и додаваат дека со етапното финансирање значи дека процесот може да се развлече до недоглед. Во зградата на Центарот за култура „Трајко Прокопиев“ во моментов функционираат три институции – драма на македонски јазик, драма на албански јазик и тековните настани и проекти, концерти, изложби и др културни настани на НУЦК како дел од годишната програма. – Моментално Театар Куманово нема своја гримиорна и фундус, и нема можност доволно долго да ги игра претставите кои ги продуцира и да одржи редовен репертоар. Но, и покрај тие околности, Театар Куманово годишно остварува и до 6 – 7 премиери, продуцирајќи претстави и со сопствени средства (најчесто детска претстава и комедија). Сакаме да напоменеме дека бевме еден од малкуте театри кои не застанаа со работа во текот на ковид- пандемијата, продолживме со продукција на нови претстави, одржавме репертоар – велат актерите. Од неодамна Театар Куманово во НУЦК доби свој импровизиран простор (кубус) – предвиден исклучиво за проби како привремено решение за нашата ситуација, но поразително далеку од тоа што вистински му треба на еден Театар за да воопшто се нарече Театар, подвлекуваат тие.]]>