Наградата „Григор Прличев“ за најдобро поетско дело за 2022 година му беше врачена на поетот Зоран Анчевски вчера на свеченост во Центарот за култура во Охрид. Неговата поема „Коњски житија“ беше избрана за најдобра на конкурсот за најдобро авторско поетско дело што секоја година се доделува во чест на славниот преродбеник. Мотивацијата за неговото творечко дело произлегла спонтано, од неговата љубов кон коњите. Токму таа љубов го инспирирала да креира дело во интересна форма, во која коњите говорат за човештвото и цивилизацијата.
– Тие се еден вид меморија, тивка меморија на нашето постоење на оваа планета кои никогаш во ниедна прилика не ги искажале своите размисли во врска со животот и постоењето. Кога почнав да работам прво морав да направам длабоки истражувања за посебни и особени коњи од битот, од легендата, од историјата, фолклорот – рече Анчески и додаде:
– Ако Прличев ја донел тука во Охрид и Македонија титулата Втор Хомер, тогаш ние со право можеме да се гордееме што сме вторите Прличеви во оваа наша литература.
За претседателот на жири-комисијата Александар Прокопиев, уште со првото читање било очигледно дека за поемата „Коњски житија“ стои автор со големо поетско умеење што, според него, е уште една потврда дека во нашата земја има големи творци.
– Веднаш се наметна поемата, од тоа како е поетски изведена… Сите делови на поемата, со вовед и епилог, покажуваат дека се работи за творец со големи познавања и поетско умеење, истовремено со голема културолошка и литературна подлога. Поемата е сепак тешка форма, да се напише добра поема треба време… Но овој конкурс покажа дека оваа земја има силни, силни творци што се зафатиле со тој жанр – рече тој.
Чествувањата по повод 130-годишнината од смртта на Григор Прличев во рамки на манифестацијата „Прличеви беседи“ продолжуваат денес со панихида и полагање цвеќе на гробот на ловороносецот, во возобновената куќа на поетот ќе се одржи настанот „Стихови и звуци за Прличев“, додека во рамки на традиционалната „Прличева визита“ ќе биде прогласена најдобрата беседа за 2023 година на тема „Прличев и ние“, како и промоцијата на аудио-записот, есејот „Душевните очи на Григор Прличев“ од академик Анте Поповски.
