Дела од последната продукција изложија членовите на Друштвото на ликовни уметници на Македонија на Годишната изложба што синоќа беше отворена во Мултимедијалниот објект „Мала станица“ во Скопје.
– Како неселективна изложба, таа оддава почит на една од нашите основни вредности: правото на секој член да ја презентира работата што најдобро го одразува сопственото уметничко патување. Оваа отвореност создава редок и автентичен портрет на моменталната визуелна уметничка сцена, прикажувајќи широк спектар на ликовни изрази и стилови обликувани од различни генерации, сензибилитети и уметнички средини – велат од уметничката Асоцијација.
Изложбата ги обединува делата во класичните медиуми: цртежи, слики, графики, скулптури-практики кои продолжуваат да ја формираат основата на визуелната креативност. Заедно со нив, современите пристапи како што се инсталациската уметност, концептуалните практики, новите медиуми, дигиталната и видео уметноста, фотографијата, експерименталните процеси и хибридните техники ги откриваат растечките можности на визуелната комуникација во 21 век.
– Оваа коегзистенција на методите илустрира и континуитет и трансформација, демонстрирајќи како уметниците ги преиспитуваат, реинтерпретираат и реинвентираат традиционалните форми додека истражуваат нови креативни територии – вели Маја Рауник-Кирков, претседател на Уметнички совет на ДЛУМ.
Според неа, ликовните дела презентирани во каталогот не служат само како документација, туку и како културен запис за нашиот сегашен момент. Секое уметничко дело претставено придонесува за колективна визуелна нарација, ги одразува темите, грижите и идеите што го обликуваат нашето општество денес – идентитет, меморија, околина, технологија, емоции и имагинација. Со спојување на овие различни перспективи, изложбата ја нагласува важноста на уметноста како простор за размислување, дијалог и отвореност.
