Претставата „Бестрашната четворка“ (Štirje neustrašni) во режија на Марјан Неќак, премиерно ќе биде изведена вечерва во Големата сала на Куклениот театар во Марибор. Автор на текстот е Саша Ержен, а е заснован на познатата бајка „Бременските музичари“ од браќата Грим. Во претставата задржани се ликовите од оригиналната приказна – магарето, кучето, мачката и петелот, но сместени во современо време. Во претставата играат Барбара Јамшек, Урша Кавчич, Миха Безељак и Грегор Прах.
Режисерот и авторот на музиката, Марјан Неќак, за кого ова е четврта соработка со театарот, вели дека ова е многу важна приказна за денешното време.
– Во оваа басна ме привлече нејзината повеќеслојност. На прв поглед, станува збор за басна за животни кои нивните сопственици ги отфрлаат бидејќи се „непотребни“. Но, зад таа едноставна приказна се крие силна и современа порака: во нашето општество често се откажуваме од оние кои повеќе не ги исполнуваат очекувањата било да се работи за постари лица, слабите или оние кои не носат брза корист, токму во тоа ја гледам современоста на темата. Магарето, кучето, мачката и петелот не се херои затоа што се моќни, туку затоа што не се предаваат и во пријателството и заедништвото наоѓаат нова цел – вели Неќак.
Марјан Неќак
Претставата има комплексен аранжман, со различни музички стилови, методи на свирење и видови кукли, кои успешно се комбинирани во една целина. Ова е претстава што е важна и за децата и за возрасните. Ержен ја драматизираше приказната на иницијатива на режисерот. Автор на визуелниот дизајн и сликање на кукли и сценски елементи е Дамијан Степанчич, сценски движења Каја Лоренци, драматург Катарина Кланчник Коцутар, лектор Метка Дамјан, светло Миљенко Кнезоци, тон-мајстор Клара Форштнерич, сценски техничар Светлана Малоич. Технолози за кукли: Мојца Брењак, Тин Маруш, Дарка Ердељи. Изработувачи на кукли, сценографија и костуми: Луцијан Јошт, Митја Пастрик, Бранко Цесерман, Златко Мешич.
Фото: Боштјан Лах
