Осмата поштенска марка посветена на децата со Спинална мускулна атрофија (СМА) излезе од печат. Ова не е само филателистички успех, туку симбол на една долгогодишна, нескршлива борба за живот и гласно препознавање на реткоста Македонија, преку овој проект, веќе осум години по ред во месецот на ретките болести, го потврдува својот статус како прва и единствена земја во светот која преку поштенските марки ја пренесува пораката на овие храбри дечиња.
Иницијативата е на Гордана Лолеска, која како вработена во АД „Пошта на Северна Македонија“ и претседател на здружението „Ретко е да си редок“ од Охрид, својата професија ја претвори во најсилна алатка за општествена одговорност.
Нејзиниот личен придонес за заедницата со СМА е доказ дека љубовта и упорноста можат да го обиколат светот на едно мало парче хартија.
„Секоја марка што ја издаваме е ветување дека овие деца нема да бидат заборавени. Како вработена во Пошта, гордa сум што мојот професионален дом стана засолниште на хуманоста. Овие 8 марки се нашиот заеднички крик дека „Ретко е да си редок“, но токму во таа реткост лежи најголемата сила. Македонија денес повторно е пример за целиот свет,“ изјави со емоција Лолеска.
Оваа серија поштенски марки низ годините стана мост меѓу институциите и граѓаните, докажувајќи дека секоја испратена пратка со оваа марка е глас за поддршка, надеж и подобра иднина за децата со СМА.
Свечената промоција на поштенската марка ќе ја одржи здружението „СТОП СМА Македонија“ на 28 февруари во Јуроп хаус во Скопје, со почеток во 16:30 часот.
