На Економскиот факултет во Прилеп при Универзитетот „Св. Климент Охридски“ во Битола вчера се одржа првиот академски час. Овој факултет одбележува 65 години постоење, а со настанот започна и мандатот на новата деканка, проф. д-р Татјана Спасеска, која во своето прво обраќање им упати срдечно добредојде до студентите.
– Започнувате возбудливо патување кое ќе ве инспирира и ќе ве научи на истрајност, храброст и посветеност. Искористете ги академските можности, особено оние што ги нудaт Еразмус+ и ЦЕПУС, како и Алијансата КОЛОРС, која ве поврзува со над 128.000 студенти од осум европски универзитети и ви го приближува европското образование дома – рече Спасеска.
Проф. д-р Татјана Спасеска
Посебна потврда за успешната соработка со бизнис-заедницата и локалната самоуправа е доделувањето на 30 стипендии од компаниите: Конфи Ангел, Прилепска пиварница, ВИК Македонија, Витаминка, Кули и Еуролинк осигурување и стипендии од Општина Прилеп која дава поддршка и за Универзитетската летна пракса на УКЛО.
Ректорот на УКЛО, проф. д-р Игор Неделковски, во своето обраќање истакна дека младите луѓе не може да се излажат. Фактот што годинава има 20 проценти повеќе запишани студенти на Економскиот факултет е најсилен доказ за довербата во неговиот квалитет.
-Дополнително, доделените стипендии од приватниот сектор и стипендии со поддршка на Општината ја потврдуваат тесната соработка со реалниот сектор и локалната заедница. Компаниите препознаваат дека токму овде се создаваат квалитетни кадри кои за неколку години ќе придонесуваат за нивниот развој. Тоа е најдобриот показател за угледот на Факултетот и за Универзитетот во целина. Во пораката до академскиот подмладок тој ги поттикна студентите да бидат здрави и среќни за да може со активност и мотивираност да ги искористат сите академски ресурси на УКЛО – рече Неделковски.
Економскиот факултет – Прилеп, годинава бележи најголем раст на новозапишани студенти на УКЛО, во споредба со минатата година, што се оценува како најсилен доказ за довербата и квалитетот на оваа институција.
Инаку, новата академска година започна свечено во сите единици на УКЛО, со доделување на индексите, запознавање со наставниот кадар и јасна порака: универзитетскиот живот е многу повеќе од учење – тоа е животна школа, патека кон иднината и простор за професионален и личен развој.
