Американскиот кинематографер Анастас Мичос, е претседател на жирито за студентската програма на ИФФК „Браќа Манаки“ во Битола. Тој одржа работилница со интересен наслов „Вкус на шампањ со буџет за пиво“, во киното „Манаки“. Мичос во моментов е актуелен по серијата Cabinet of Couriosities.
– Сум работел на филмови шточинат и 100 илјади долари, како и на филмови што тежеле милиони долари. На присутните им претстави и кинески фенер, со помош на кој снимал филмски сцени.
– Ова е една од моите омилени алатки. Тоа е фенер кој е многу едноставен, може да се носи каде било.Користен е за прекрасни филмови во последниве години. Не се работи за тоа колку скапа опрема имате, туку што можете да направите со она што ви е достапно и на располагање. Првото нешто што јас го правам, е она што е речиси бесплатно – рече Мичос.
Кога буџетот за филм е мал, според него, неизбежно е да се направи нешто од ресурсите кои се на располагање.
– Светлото во фенерот е „меко“. Ми се допаѓа бидејќи едната половина е обоена во црно, па по потреба можам да користам помалку или повеќе светло. Не ми се допаѓа светлото од светилките, додаде Мичос.
Тој прикажа неколку сцени од различни филмови, објаснувајќи какво светло користел во текот на снимањето на истите. Во една од нив снимал со огледало, односно користел рефлектирачка сончева светлина.
– Не мора да биде комплицирано за да биде ефектно. Воопшто“, рече кинематограферот.
Тој истакна дека еден директор на фотографија никогаш не би му рекол на режисерот „не знам да го направам ова“ или „не можам да го направам ова“.
„Тие зборови не постојат во речникот. Ние сме тука да најдеме начин нештото да успее“, додаде Мичос.
Анастас Мичос има работено на повеќе номинирани и наградувани филмови. Тој е активен член на Американското здружение на кинематографери, на грчкото друштво на кинематографери, како и на Академијата за филмски уметности и науки. Исто така, е предавач и на различни универзитети и работилници низ САД и Европа. Во неговата криера, има работено со Бијонсе Ноулс, Хали Бери, Кирстен Данст, Џулија Робертс, Анџела Басет, Џулијан Мур и многу други.
