„И јас сум тука“ е несловена изложбата на фотопортрети на авторите Тоше Огњанов и Сребра Ѓорѓијевска која вечерва во 19 часот ќе биде отврена во фојето Центарот за култура „Марко Цепенков“ во Прилеп. Во рамките на изложбата ќе бидат промовирани и книгата „И јас сум тука“, во која се сместени сите приказни на луѓето-учесници на изложбата, како и македонскиот превод на „Не престанувајте да се гушкате“ од Оса Емрот, книга со цитати на актерите од театарот „Глада Худик“ од Шведска. Следува проекција на филмот „Модна ревија: од ,Глада Худик’ до Њујорк“.
Изложбата вклучува 20 лица со попреченост од повеќе градови од Македонија на различна возраст, а портретите се придружени и од приказни посветени на нив. „И јас сум тука“ е дел од проектот „Децата не се раѓаат со предрасуди“, чиј иницијатор е театарот „Глада Худик“ од Худиксвал, Шведска, со поддршка на Шведскиот институт. Ова е проект кој во Шведска од 2014 година дал одлични резултати во борбата против предрасудите, а во Македонија се спроведува од 2020 година. Здружението на граѓани за поддршка на лицата со посебни потреби „Солем“ преку разни активности се вклучи во проектот за што повеќе деца во земјава да бидат опфатени преку активности реализирани во училиштата.
– Целта на проектот „Децата не се раѓаат со предрасуди“ е да се смени стереотипното однесување кон луѓето со попреченост, да се намалат стигмите и да се крене свесноста за интелектуалната попреченост – вели Ануки Стуруа, проект-менаџер на „Децата не се раѓаат со предрасуди“.
Тоше Огњанов и Сребра Ѓорѓијевска
Авторите велат дека „И јас сум тука“ е едно големо патување и за нив. Се родил од потребата да зборуваат гласно за луѓето што се меѓу нас, а кои понекогаш се правиме дека не ги гледаме, ниту сакаме да ги слушнеме.
– Да зборуваме гласно и без грутка во грлото за луѓето што само сакаат да бидат поздравени, почитувани, сакани, да бидат дел од целото. „И јас сум тука“ е можеби многу поважно патување за сите нас да се свртиме кон себе и кон другиот, да го погледнеме другиот и да му ја почувствуваме душата, која многу често е повредувана. Предрасудите лесно се создаваат, а тешко се надминуваат“ – велат авторите.
Основач на проектот е театарскиот режисер, продуцент, сценарист Пер Јохансон. Документарниот филм „Модна ревија: Од ,Глада Худик‘ до Њујорк“ во режија на Јохан Ског е популарен филм во Шведска во кој учествуваат актерите од театарот „Глада Худик“, на кои им се остварува животниот сон да учествуваат на модна ревија во Њујорк. Сценариото е на Терезе Брингхолм, Лиа Сидерштром, Јохан Ског. Улогите ги толкуваат: Ема Ертлунд, Никлас Хилберт, Пер Јохансон, Ида Јохансон, Аника Гранлунд Јонсон и др.
Во филмот играат актери од театарот „Глада Худик“, кој е основан во 1996 година од Пер Јохансон,кој смета дека секој од нас треба да биде продолжена рака на луѓето што имаат некаква попреченост. Актерите во овој театар се вистински ѕвезди во Шведска и помогнале многу во борбата со предрасудите кон лицата со интелектуална попреченост.
Насловна фотографија: Диоген Хаџи-Коста Милевски
