Новинарката и филмска критичарка Гена Теодосиевска е избрана за претседател на четирите жирија на меѓународната филмска критика ФИПРЕСЦИ на 73. Берлински филмски фестивал, што годинава ќе се одржува од 16-26 февруари. Теодосиевска е позната како ТВ-новинар, критичар, фестивалски селектор и познавач на филмските и визуелните уметности. Таа беше селектор, уметнички директор и директор на ИФФК „ Браќа Манаки“ од 2008 до 2020, а од 2022 година е назначена за уметнички директор на ИФФ „Киненова“. Како соработник и продуцент се појавува во 23 кратки видеодела во продукција на МТВ, а беше извршен продуцент на филмот „Судијата“, прикажан на над 30-ина филмски фестивали низ светот, вклучително премиерно и на Венецискиот филмски фестивал во 2001 година.
Во последниве 30 години таа е посветен проследувач, експерт за документарен и краток филм на неколку европски филмски работилници, координатор на меѓународни копродукциски ТВ-проекти и промотор на македонската визуелна уметност.
За член на жири била поканета на повеќе од 25 меѓународни филмски фестивали. Берлиналето е втор фестивал од А категорија по IDFA во Амстердам, на кој таа е дел од оваа високопочитувана оценувачка комисија. Гена Теодосиевска е активен член на македонската секција на ФИПРЕСЦИ, а вработена е во МРТ.
