Проектот „Добри гости“ на издавачката куќа „ПНВ Публикации“ од Скопје утре ќе гостува во Тетово. „Добри гости“ иницира серија книжевни гостувања на автори од Скопје во внатрешноста на земјата на заеднички читања со локални автори, а во соработка со локални чинители.
Настанот ќе почне во 18 часот во „Инфинити ‒ кичен бар“, а ќе читаат: Лилјана Пандева, Снежана Стојчевска, Љубица Шопова, Ѓоко Здравески и Андреј Ал-Асади, Перица Сарџоски, Јован Дамјановски, Милена Илиевска, Наим Иљази, Тофе Јаковлевски, Никола Трпески ‒ С.А.М. и Ангела Бошкоска. Настанот ќе го водат Јулијана Величковска и Андреј Медиќ Лазаревски, а „Култура бета“ ќе биде медиумски партнер на проектот.
„Добри гости“ се состои од читање поезија и проза, емитување поетски и други краткометражни филмови поврзани со литературата, разговори со автори, со издавачи, разни трибини, книжевни промоции, работилници и слично. Овие гостувања се планира да се одржат во повеќе градови, по што иницијативата ќе заврши кон крајот на годинава со маратонско книжевно читање во Скопје, на кое, доколку се во можност, би учествувале сите вклучени автори.
