Руралните домаќинства и малите производители се клучен двигател на локалниот економски развој, рече министерот за култура и туризам Зоран Љутков најавувајќи го Саемот за рурален туризам што денеска и утре ќе се одржи во „Јавна соба“ во Скопје. Околу 50 излагачи од целата земја ќе ги претстават своите производи и услуги што ги нудат. Саемот го организираат Министерството за култура и туризам, во партнерство со Амбасадата на Словенија, Швајцарската амбасада преку програмата ИМЕ, Земјоделскиот институт од Скопје и „Јавна соба“. Саемот ќе се одржува до 10 до 17 часот, а влезот е бесплатен.
Љутков вели дека руралниот туризам ќе биде еден од стратегиските приоритети на Министерството и вакви настани ќе бидат сè почести во текот на наредните три години.
– Преку проектот Е-75, активно работиме на развој на транзитниот туризам. Нашата цел е да се зголеми просечниот престој на туристите во должина на оваа траса од 24 на 72 часа. Оваа година имаме 36 милиони денари за програмски активности и дополнителни 150 милиони денари за субвенции во туризмот. Овој буџет ќе се зголемува секоја година зашто секој вложен денар во туризмот носи четирикратен економски поврат – вели Љутков.
Од Земјоделскиот институт најавуваат дека на Саемот доаѓаат најавтентичните домаќинства од цела Македонија, кои нудат сместување и многу повеќе од тоа. Посетителите ќе имаат можност одблиску да се запознаат со сместувачките капацитети, програмите за сите генерации кои се нудат во домаќинствата, деликатесите и амбиентот што го нудат.
– Запознајте се со рурални домаќинства од цела Македонија со капацитет до 20 легла, мали и автентични винарии со можност за сместување и дегустации и агро и рурални бизниси кои нудат мир, природа и топло гостопримство. Има можности за подолг престој, вистинско рурално доживување, адреналински активности во природа, часови по традиционално готвење и други автентични искуства – велат од Институтот.
Посетителите можат да добијат детални информации за организирани активности во самите домаќинства, настани во природа за групи и поединци, за деца, млади и возрасни, за професионалци, странски и домашни посетители, гастрономски и вински искуства, работилници за деца и возрасни, музички и стенд-ап перформанси.
– На саемот може да се дегустираат и купат органски производи, вина, ракии, најразлични деликатеси, традиционални специјалитети и преработки од различни региони на Македонија – директно од луѓето што ги одгледуваат, произведуваат и создаваат. Овој саем е дел од пошироката визија за одржлив и креативен туризам, каде посетителите не се само гости, туку активни учесници – велат од Институтот.
Повеќе информации за излагачите на линкот.
