Промоција на збирката поезија „Огнени рози“ од младата уметница Лина Кепсарова ќе се одржи денеска во 12 часот, во просторот The Dude Specialty Coffee во Скопје. „Огнени рози“ е интимна поетска целина која низ лирски писма и песни го истражува односот помеѓу љубовта, копнежот и емоционалната сувереност. Збирката отвора простор за размислување за нежноста, автономијата и слободата во љубењето, преку силен и ранлив поетски глас.
Насловната корица на книгата е авторско уметничко дело на Кепсарова, создадено во рамки на изложбата „Иницирај промена! Креирај гласно“, иницијатива на Здружението „Биди човек“. Кепсарова е 16-годишна млада уметница и ученичка во Државно средно училиште за ликовна уметност и дизајн „Лазар Личеноски“ во Скопје. Покрај визуелната уметност, таа активно се изразува и преку поезијата, како дел од иницијативата „Иницирај промена! Креирај гласно“, каде работи на себеспознавање и охрабрување на младинскиот глас. „Огнени рози“ е интимен и лирски дијалог меѓу копнежот и љубовта, составен од поетски писма до таен обожавател. Книгата ја истражува нежноста, автономијата и емоционалната сувереност, славејќи ја љубовта како простор на слобода, а поезијата како искрен и храбар израз на срцето.
