Хедли фондот за културно наследство во Југоисточна Европа го објави вториот повик за непрофитни организации и јавни институции (музеи, библиотеки, архиви и галерии) за поддршка на проекти насочени кон зачувување, промоција и одржливо користење на културното наследство. Покрај македонските, право на аплицирање имаат организации и институции од Албанија, Босна и Херцеговина, Бугарија, Хрватска, Грција, Косово, Црна Гора, Романија, Србија и Словенија. Фондот поддржува регионална соработка, ангажирање на заедницата и одржливо управување со културното наследство, поврзувајќи ги традиционалните знаења и вештини со современите технологии.
– Финансирањето е наменето за проекти што нудат иновативни пристапи за заштита на наследството и активно ги вклучуваат локалните заедници. Особено се ценат проекти што поттикнуваат регионална соработка и долгорочни подобрувања во секторот на културното наследство. Апликациите мораат јасно да ги дефинираат предизвиците, потребите и методологијата и да вклучуваат процена на ризици, стратегии за ублажување и план за евалуација за да се обезбеди нивното влијание и одржливост – велат организаторите.
Фондот поддржува мали проекти до 5.000 евра и поголеми иницијативи до 10.000 евра. Вкупниот буџет за повикот изнесува 66.000 евра, а сите одбрани проекти треба да започнат со реализација во 2025 година.
Пријавите се поднесуваат на англиски јазик и мораат да содржат целосна потребна документација. Рокот за аплицирање е 9 мај годинава. Сите заинтересирани за повикот може да ги контактираат Милена Милошевиќ Мициќ, координаторка на Фондот за културно наследство во Југоисточна Европа и milena.m.micic@gmail.com и д-р Ирена Ружин irenaruzin@gmail.com.
Хедли фондот за културно наследство во Југоисточна Европа е посветен на зајакнување на организациите кои работат во областа на културното наследство. Целта е да се обезбеди наследството да остане жив и динамичен дел од заедниците, поттикнувајќи иновации, одржливост и регионална соработка.
Повеќе информации на линкот.
