Диана Добрева, една од најзначајната театарски режисерки во Европа, ќе одржи работилница во Театарот „Јордан Хаџиконстантинов-Џинот“ на 29 и 30 април. Работилницата е дел од двогодишниот меѓународен проект „Манифест“ кој Велешкиот театар го реализира во соработка со Драмскиот театар „Н. О. Масалитинов“ од Пловдив, Бугарија. Работилницата, наменета за актери, е од отворен карактер и истата е кастинг за претставата „Без крв“, втор наслов од меѓународниот проект „Манифест“, по минатогодишниот „Едвард Втори“ потпишан од Андриј Жолдак.
По неодамнешниот голем успех на претставата „Одисеј“ на најзначајниот европски театарски фестивал, унгарскиот МИТЕМ и пред нејзината претстојна изведба во атинскиот „Пираус“ (претставата беше лауреат на ИФАД Стоби во 2022 година), како и непосредно по неодамнешната премиера на исклучителните сценски дела „Едип и пророците“ во Пловдив и „Моби Дик“ во театарот „Иван Вазов“, Софија, следна продукција која Добрева ја отпочнува е токму „Без крв“, текст на Александар Секулов по мотиви на истоимениот роман од Алесдандро Барико, во копродукција меѓу театрите од Велес и Пловдив.
Пријавување за работилницата на upravadzinot@gmail.com.
Проектот е дел од годишната програма за работа на Министерството за култура, а партнери на проектот, покрај двата театри се: Бугарскиот културно-информативен центар во Скопје, Македонскиот културно-информативен центар во Софија, како и неколку меѓународни фестивали.
