Културно-едукативниот центар „Лабораториум“ од Скопје е еден од 50-те финалисти на фестивалот New European Bauhaus Project, каде што се доделуваат престижни награди за иновативни, одржливи или инклузивни проекти од цела Европа. Фестивалот се одржува по четврти пат во организација на претседателката на Европската Комисија, Урсула фон дер Лајен. „Лабораториум“ беше номиниран поради својата иновативност при пренаменување на стар индустриски објект – поранешната печатница на „Нова Македонија“, во нов простор за културно-едукативни збиднувања кои ги поддржуваат креативните индустрии и ја помагаат независната уметничка сцена во Скопје.
Со преку 520 пријавени проекти, „Лабораториум“ од Скопје беше избран за еден од 50 финалисти во една од десет категории, односно финалист во категоријата Prioritising the places and people that need it the most. Избраните финалисти ги сочинуваат само оние проекти во кои Европската Комисија согледала голем потенцијал, а воедно ги претставуваат вредностите и целите на Комисијата – соопштија од Културно-едукативниот центар.
Воедно центарот работи и на воспоставување на едукативна програма која ќе ги возобнови рачната изработка и занаетчиството. Настанот се одржа во музејот на Историја и уметност во Брисел во Белгија. Апликацијата за проектот ја подготвија Јана Павловска и Калина Дуковска кои воедно беа и на доделувањето во Брисел.
Во рамки на центарот, има и изложбено-продажен дизајн маркет (ЛабДизајнМаркет) каде 20 локални занаетчии и дизајнери ги претставуваат своите рачно изработени дела, со што се гради една заедница на дизајнери. Маркетот е отворен секој вторник до сабота од 12 до 18 часот.
