Режисерот Игор Иванов-Изи со мнозинство гласови е реизбран за претседател на Друштвото на филмски работници на Македонија. Тој ќе го предводи друштвото во наредните четири години.
– Во овој мандат, фокусот ќе биде ставен на зголемувањето на националниот буџет за филм и други аудиовизуелни дела, донесување на нов закон за филмска дејност и конечно решавање на статусот на филмските работници – пишува во соопштението на ДФРМ.
На редовното изборно Собрание биле усвоени и извештаите на Симеон Мони Дамевски за фестивалот „Браќа Манаки“, на Томи Салковски за „Златна Рамка“ – Ревија на македонски филм и на Иван Ивановски за „50 години македонски анимиран филм“.
