Од почетокот на годината, Агенцијата за филм има исплатено 140 милиони денари на продукции на македонски филмови кои се во фаза на постпродукција. Причината зошто во првата половина на годината не се снимало филмови е лоцирана во индивидуални и различни причини внатре во продукциите, ова е дел од темите на кои директорот на Агенцијата за филм, Бојан Лазаревски, зборуваше со филмските работници на неформална средба во Кинотеката на Македонија. Агенцијата за филм е подготвена да ги финансира филмовите најавени од продуцентските куќи како подготвени да почнат со снимање.
Второто прашање е исходот од првиот рок на Конкурсот за филм. Фокусот беше ставен на транспарентно образложување на распределбата на расположливиот буџет на првиот конкурс. Агенцијата за филм планира да воведе уште поголема транспарентност кога станува збор за конкурсите и начинот на вреднување на проектите.
– Исходот од минатиот конкурс е поддршка на 15 македонски филма со мнозинско учество и 9 филма со малцинско учество на македонски копродукции.
Одлуката зошто токму ваква распределба да се донесе на овој конкурс е поради оптимизирање на средствата и изнаоѓање на најдоброто решение за македонската кинематографија во период кога веќе 17 филма се одобрени и треба да почнат со снимање (одобрени од претходните конкурси), кога буџетот претрпе намалување и конечно фактот што мора да се одржи баланс во учеството на Агенцијата за филм кај малцинските проекти кога македонскиот филм е многу повеќе помогнат од страна на регионалните и европски продукции – истакна Лазаревски.
