Операта „Набуко“ од Џузепе Верди ќе биде изведена во Националната опера и балет на 19 мај (20) часот во рамките на 53. издание на фестивалот „Мајски оперски вечери“. Диригент е гостинот од Грција, Мирон Михаилидис, режијата е на Ренато Бонајуто (Италија), а сценографијата и костимографијата се на Флавио Арбети и Артемио Кабаси од Италија. Кореограф е Маја Митровска-Богојевска, концерт-мајстор е Јане Бакевски, хор-мајстор е Јасмина Ѓорѓеска, а дизанј на светло, Милчо Александров.
Улогата на Набуко ќе ја толкува Луис Кансино од Шпанија, во улогата на Абигаиле ќе настапи Ханјинг Цо од Кина, Николина Јаневска ќе ја толкува улогата на Фенена, Уго Тарквини (Италија) ќе настапи како Исмаил, а во улогата на Захарие ќе настапи Џовани Пароди (Италија), а во останатите улоги ќе настапат Диме Петров, Ана Ројдева, Дејан Стоев, хорот, оркестарот, балетскиот ансамбл на Националната опера и балет и ученици при ДМБУЦ „Илија Николовски – Луј“.
„Набуко“ е лирско-драматична опера во четири чина, едно од најпопуларните дела на Верди. Праизведбата била во 1842 година во „Скала“ во Милано. Ова е трета опера на Верди за којашто се смета дека трајно ја воспоставила неговата репутација како композитор. Темата е тешката историја на еврејскиот народ, нападнати и поразени, протерани од својата татковина, иако историските настани се користат само како позадина на романтичниот и политички заплет. Верди во една ноќ ја напишал надалеку познатата хорска арија која станала драматуршки и музички столб на делото „Va, pensiero, sull’ali dorate“ („Летај на златести крилја“).
