Младиот македонски кошаркар Никола Костов (15) настапи на силен турнир на Европската младинска кошаркарска лига (EYBL) во Букурешт, во категорија на играчи до 16 години и ја освои наградата најкорисен играч (MVP) за својата екипа. Костов беше единствен претставник од Македонија на турнирот каде настапи на покана на Budapest Prep Academy, мешана екипа составена од надежни и талентирани играчи од кошаркарски клубови од цела Европа. Поканата е потврда дека и европските кошаркарски експерти ја препознаваат неговата добра игра, талентот и постигнатите резултати на домашен и на европски терен.
Турнирот во Букурешт се организира според форматот на популарната кошаркарска сениорска Евролига и таму настапуваат најдобрите младински екипи од цела Европа. Костов настапи со свои врсници, талентирани млади кошаркари од клубови од Италија, Романија, Англија и други земји. Поради добрата игра, тој ќе учествува и на големото финале на крајот на сезоната во Рига, Латвија.
Костов е член на најтрофејниот кошаркарски клуб во младински категории во Македонија, „Водно Санс“, каде настапува во две селекции (кадети и јуниори) со својот една година постар брат, Матеј Костов и се државни шампиони на Македонија во изминатите неколку сезони во кадетска категорија. Костов беше избран и за најталентиран спортист на општина Карпош за 2023/2024 година, а со училишната екипа освои прво место на државното првенство во училишната лига.
