Меѓународниот фестивал за филмови снимени со мобилен телефон „Мобил фестивал“ објави отворен повик за пријавување филмови за 12. издание, кое ќе се одржи од 25 ноември до 1 декември. Може да се пријават сите чии филмови се снимени со мобилен телефон, не подолги од 10 минути, а кои не биле пријавени на претходните изданија на фестивалот. Во конкуренција ќе влезат сите филмови што ќе пристигнат до 15 ноември годинава.
Селектираните филмови ќе влезат во конкуренција за наградаите за: најдобар филм „Ратка Илиевска-Лале“; за најинвентивен филм; за најоригинална приказна; за најдобра идеја и награда за најдобар филм во домашната програма „Млади таленти“.
Најдобрите филмови ќе бидат прикажани во натпреварувачка програма на интернационалните фестивали кои се во мрежата фестивали за филмови снимени со мобилен телефон, а се во партнерство со „Мобил фестивал“. Филмовите може да се пријават на електронската адреса: mobifestkonkurs@gmail.com или преку профилот на фестивалот на FilmFreeway. Организатор на фестивалот е продуцентската куќа „КТ Филм и Медиа“, а поддржан од Град Скопје.
