Во киното „Фросина“ во Младонскиот културен центар во Скопје вечерва во 20.30 часот концерт ќе одржи скопскиот колектив „Светлост“, заедно со Ken Vandermark од САД и Paal Nilssen-Love од Норвешка. Од соработката на домашното трио и двете големи меѓународни имиња на современиот џез ќе произлезе и албум, а снимањето ќе се случи во Скопје, непосредно по концертот во МКЦ.
– Ова е веројатно прв случај една македонска џез група да работи со гиганти од светската џез сцена, какви што се Vandermark и Paal Nilssen, нам добро познати и по настапите на Скопскиот џез фестивал. Препознатливи по својот спонтан пристап, разноликата жанровска естетика и бестрашниот однос кон звукот, „Светлост“ успешно синтетизират џез, ноиз и амбиетални елементи – велат од Скопски џез фестивал.
Меѓу 2019 и 2020 година тие објавиле три албуми, одлично примени од критиката и слушателите: „Odron Ritual Orchestra“, „Jazz (to the working class)“ и „Six Years“. По настапот на Скопскиот џез фестивал дојде и четвртото издание – „A Wave Returns To The Ocean“. На почетокот на 2024 беше објавен и нивниот последен албум, „Everything Was As It Had Been a Minute“.
Проектот на „Светлост“ со Ken Vandermark и Paal Nilssen-Love се реализира со турскиот продуцент Can Inandim. Билетите можат да се купат онлајн на bileti.mkc.mk и на билетарницата на МКЦ пред настапот.
