Кантавторката Дина Јашари го објави синглот „Градот“, заедно со видеоспот, со кој официјално го најавува нејзиниот нов звучен израз.
– Песната е посветена на сите луѓе и места, присутни и за жал некои од нив отсутни, што му даваат смисла на градот – вели Јашари.
„Градот“ е нова етапа во музичкото патување на Јашари, откривајќи свеж звук кој ја зацврстува нејзината позиција на македонската, но и на пошироката балканска музичка сцена. Песната е интимна, посвета на Скопје, што е вешто пренесено преку визуелниот приказ на автентични локации од градот во видеоспотот, чиј автор е младиот видеограф Доан Акити. Дизајнот во видеоспотот е дело на Васил Шемко.
Во видеото се појавуваат и долгогодишните соработници и членови на нејзиниот бенд – Лука Тошев и Драган Теодосиев. Јашари е авторка на текстот и музиката, а во аранжманот ù се придружуваат Тошев и Теодосиев. Продукцијата е на Јашари и Димитрије Марковиќ, миксот е на Драги Иванов а мастерингот на Roy Recklies.
„Градот“ е достапен на сите дигитални платформи, а нови песни се очекуваат наскоро, носејќи уште повеќе искрени приказни и современи звуци што го рефлектираат растот и визијата на оваа извонредна млада артистка.
