Еден пример за флексибилност на факултетот е новиот пакет Study+, кој ќе почнеме да го спроведуваме со новата академска година, вели Петра Клеиндинст, продекан на Факултетот за применети социјални студии во Словенија
Повеќето странски студенти ја избираат Словенија за студирање поради животниот стандард што е релативно добар и многу студенти наоѓаат работа. Истовремено студентите од земјите на поранешна Југославија лесно го совладуваат словенечкиот јазик, а во природните знаменитости нудат многу можности за квалитетно исполнето слободно време, вели Петра Клеиндинст, продекан на Факултетот за применети социјални студии во Словенија. Со неа разговараме за можностите за студирање на овој факултет, како се транформираше наставата и студирањето во измината година.
Фото: Pixabay
Како студентите ги прифатија промените во секојдневието предизвикани од пандемијата со ковид-19?
– Нашите колеги, академскиот кадар, беа позитивно изненадени од одговорот на студентите во однос на ова прашање. Предавањата, речиси преку ноќ, беа префрлени онлајн, што иницијално претставуваше одреден организациски предизвик и за факултетот и за студентите. За многу кратко време студентите се навикнаа на новиот начин на студирање и сфатија дека користењето на ИТ-ресурсите заштедува многу време, но и пари. Стана најпопуларен начин на студирање. Како и да е, треба да се спроведува и настава во живо кога е потребно, за да ги опремиме нашите студентите со сите вештини содржани во нашата студентска програма.
Како Факултетот за применети социјални студии ги привлекува студентите од другите земји? Што им нудите на студентите?
– Факултетот привлекува голем број студенти од странство, главно поради неговата флексибилност. Студентите на нашиот факултет не се само броеви; ги разбираме грижите и проблемите на нашите студенти и се обидуваме да ги организираме студиите на таков начин што студентите можат да ги исполнат своите студентски обврски што е можно полесно. Еден пример за флексибилност на факултетот е новиот пакет Study+, кој ќе почнеме да го спроведуваме со новата академска година. Овој пакет овозможува студентите да извршат многу од нивните студиски обврски од далечина, користејќи ИКТ ресурси (Zoom, итн.). Ова е пакет што ќе биде особено корисен за странските студенти.
Петра Клеиндинст
Дали вашите студенти може да работат додека студираат? Имаат ли време, можности, ресурси…
– Нашите студенти имаат многу добри шанси да ја завршат својата работа додека студираат и така да обезбедат доволно средства за егзистенција. Ги охрабруваме да работат додека студираат, бидејќи сме свесни дека студентите имаат и многу други лични грижи и обврски што треба да ги исполнат. Им нудиме информации во врска со барање работа во Словенија и ги поврзуваме со студентската служба. За да им се олесни на студентите да ги балансираат своите студии со работните обврски, се организираат предавања и попладне. Исто така прилагодуваме многу други аспекти на нивните студии.
Може ли да ги опишете спецификите на словенечкиот образовен систем. Зошто многу македонските студенти, но и од други држави на поранешната заедничка држава, студираат во Словенија?
– Повеќето странски студенти на нашиот факултет доаѓаат од поранешната заедничка држава. Словенија е многу добар избор за нив, бидејќи постојат одредени сличности помеѓу словенечкиот јазик и јазиците на земјите од поранешна Југославија, што им помага на студентите многу брзо да го учат словенечкиот јазик. Покрај тоа, животниот стандард во Словенија е релативно добар и многу студенти наоѓаат работа. Во исто време, Словенија со своите природни знаменитости нуди многу можности за квалитетно исполнето слободно време.
Фото: Pixabay
Фокус на научен интерес Ви е човечкото достоинство. Како науката го дефинира „човечкото достоинство“? Успеваме ли како човештво да го задржиме?
– Човечкото достоинство се дефинира како концепт составен од првично и реализирано (остварено) достоинство. Првичното достоинство подразбира дека секое лице има респектабилен статус или статус на човечка апсолутна суштинска вредност. Тоа произлегува од човечката природа и ги разликува човечките суштества од другите видови и претставува еден вид метафизички елемент неразделно поврзан со луѓето и со тоа постои во кој било простор и време. Оствареното достоинство како втора димензија на човечкото достоинство укажува до кој степен човечкото достоинство се реализира/спроведува кај одредена индивидуа. Ова значи дека не е потребно секое човечко суштество, определено со првичното достоинство, истовремено да ужива и во реализираното достоинство. Општо, човечкото достоинство претставува важен елемент на идентитетот на луѓето. Присуството на концептот на човечко достоинство се зголемува во светски рамки и се чини дека е фундаментален концепт во демократските општества. Особено е важно да се поттикне разбирање и свесност за важноста на човечкото достоинство кај младите. Различни агенти на политичка социјализација (училиште, семејство, медиуми…) може да играат значајна улога во овој процес.
