Во пабот „Ѕе“ во Скопје вечерва во 21.30 часот концерт ќе одржи македонскиот фри-џез ураган состав „Светлост“. Нивната музика носи елементи на дарк, дум, панк, модални и психоделични форми на џез. Најновиот албум на бендот – Everything Was As It Had Been a Minute Ago од 2024 година, беше ко-издание од PMGJazz (Скопје) и Inverted Spectrum Records (Будимпешта/Анкара/Белград) беше нивни трет албум на листата на Bandcamp Daily меѓу „најважните џез изданија на месецот“.
Светлост ја отсвиреа својата прва подолга меѓународна турнеја во 2024 година, а неодамна одржа серија концерти во Македонија, Србија, Хрватска и Словенија со легендите на фри-џезот Пол Нилсен-Лав и Кен Вандермарк. Нивниот заеднички албум ќе биде издаден оваа година.
Светлост е основан во 2014 година од Нинослав Спировски (кларинет, сопран и тенор саксофон) и Дени Омерагиќ (контрабас, бас гитара, електроника), заедно со Кристијан Новковски (тапани). Неодамна им се придружи и Драган Теодосиев (тапани), кој, покрај неговите матични проекти Taxi Consilium и Shock Troopers, е поврзан со Svetlost од 2019 година и свиреше на нивните (критички признати) албуми – „Odron Ritual Orchestra“ (2019, PMGJazz) и „A Wave Returns to the Ocean“ (2021, SJF Records).
