„Амплидајн ефект трио“ и Добрила Грашеска ќе одржат импровизиран музички концерт в петок (5 декември) во 21 часот во кафе-книжарницата „Буква“ во Скопје. „Амплидајн ефект трио“ е концертна формација на музичкиот проект Amplidyne Effect на Мартин Георгиевски, активен од 2009 година и препознатлив по амбиентална, електронска и импровизирана музика. Проектот има издадено повеќе албуми и настапувано на фестивали како Pohoda Festival, Десонанз, Live Soundtrack, PNEM Sound Art Festival, и други. Во скоро време го издаде и најновото ЕП „Maelstrom EP“ за македонската издавачка куќа „Шарла“, кратко издание што претставува спој на амбиентална музика со шугејз текстури и синтсајзерски елементи.
Како трио, Амплидајн ефект настапува заедно со Владимир Мартиновски (тамбура, кавал, удиралки) и Соња Димитриоска (флејта), а специјална гостинка на концертот е Добрила Грашеска, македонска вокалистка и авторка активна од 2006 година, позната по работата со Чалгија саунд систем и Добрила и Дориан дуо. Има издадено неколку албуми (Чалгија Саунд Систем, Тихувај, Апокриф, Пиле шарено), а уште два нови албуми ја чекаат светлината на денот. Настапувала на фестивали како Rudolstadt, Sfinks, Colour Meeting Festival, Festival Aux heures d’été, Etnosoi!, Sarajevo Jazz, Offest, и има соработувано со бројни регионални и меѓународни уметници, како и на филмска, театарска и мултимедијална музика.
Концертот е целосно од импровизиран карактер, со фокус на моментална интеракција, амбиентални текстури, акустика и вокал.
