Kнижевната награда „Оливера Николова“ за 2025 година ќе биде врачена вечерва во 19 часот во книжарницата „Литература.мк“ во „Дајмонд мол“ во Скопје. Ќе биде и промовиран победничкиот роман „Џинџуџе“ од Ермис Лафазановски, во издание на „Либи“, дел од „Арс Ламина – публикации“.
На доделувањето на првиот добитник на оваа награда за најдобар необјавен роман за деца и млади, востановена од издавачката куќа „Арс Ламина“, ќе се обрати жирито во состав: Оливера Ќорвезироска, Весна Мојсова-Чепишевска и Јагода Михајловска-Георгиева, како и Јана Андреевска, ќерка на Оливера Николова.
