Во киното на Железничката зграда во Скопје вечерва во 20.30 часот ќе биде изведен перформативниот шетачки есеј, радиодрама во три чина „Градот е јавност – #2 дел Случајот Скопје 1945-2025“. Станува збор за колаборативен уметнички проект на Филип Јовановски, куриран од Владимир Јанчевски, а актерка/изведувачка е Мартина Даниловска.
– Филип Јовановски го поставува прашањето како нашето секојдневно искуство на градот и градскиот амбиент, неговото минато и сегашност, можат да бидат искористени како содржина и театарска сцена, како изложбен простор кој се доживува преку прошетка, дискусија, експериментална работа во лабораторија или практичните аспекти на секој нов продукциски предизвик. И претходните изведби, како шетачко искуство низ физичкиот простор, но и љубопитноста и препуштањето на имагинацијата се истовремено и истражувачка методологија и уметничка форма. Овој перформативен есеј, во форма на видеоинсталација и радиодрама, кој се заснова на шетачки тури, ги преиспитува границите на уметничките конвенции, дисциплинарните граници и ригидните форми, без да заглавува во самодоволната дискусија на една тесно дефинирана уметничка сфера – вели Јанчевски.
Проектот „Градот е јавност: Случајот Скопје (1945-2025)“ е продуциран како дел од долгорочниот проект поддржан од Програмата за култура на Швајцарска амбасада во земјава и е претставен како дел од поширок кураторски концепт во кој се вклучени повеќе организации и институции од земјава и од Европа.
Филип Јовановски дипломирал на Архитектонскиот факултет при УКИМ во Скопје , а магистрирал на Факултетот за ликовни уметности при УКИМ во 2019 година со проектот „Кога зградите би зборувале“. Јовановски со неговиот изразен интердисциплинарен пристап истражува различни медиуми и нивната интердисциплинарна конекција – визуелна уметност, театар, видео, архитектура, филм и просторни инсталации. Најчесто уметничко изразно средство се просторните визуелни интервенции во јавен простор. Тој создава долгорочни општествено- ангажирани уметнички проекти, кои се базираат на истражување и честопати во соработка со различни заедници.
Фото: Наташа Гелева
