Филмот „На сè ќе дојде крај“ (Svemu dođe kraj) на режисерот Рајко Грлиќ, во кој и Македонија е копродуцент, ќе учествува на програмата Open Air во рамките на 30. Сараевски филмски фестивал. Ова е последен филм на хрватскиот режисер Рајко Грлиќ, според сценарио на Анте Томиќ. Филмот е соработка помеѓу: Хрватска, Бугарија, Србија, Македонија, Црна Гора, Босна и Херцеговина и Турција. Македонски продуцент е Елена Станишева и „Веда филм“.
Улогите ги толкуваат: Живко Аночиќ, Јелена Ѓокиќ, Борис Исаковиќ, Јанко Поповиќ Волариќ, Емир Хаџихафизбеговиќ, Ксенија Маринковиќ, Марина Реџеповиќ и други. Игра и Петар Арсовски. Музиката во филмот е дело на Дуке Бојаџиев.
Во Загреб, истакнатиот адвокат Макс Пинтер успешно го брани својот клиент, богатиот и моќен Динко Хорват, од обвиненијата за двојно убиство. Додека ја слават пресудата, Макс отворено го обвинува Динко дека ладнокрвно пукал во двајцата работници – кои сакале само да се распрашаат за нивните плати. Како резултат на овој конфликт со Динко, кој е столб на општеството, Макс е исфрлен. Тој е напуштен од неговиот деловен партнер, неговите клиенти и неговата сопруга. Но, тој не се предава, и оди во напад со помош на Нина, неговата љубов од факултетските денови.
Филмот се снимаше есента 2023 година.
