На сцената на Македонскиот народен театар вечерва во 20 часот, премиерно ќе биде изведена претставата „Лејди Магбет“, најновото кореографско остварување на Рисима Рисимкин и Скопје танцовиот театар. Во насловната улога како Лејди Магбет настапува Анастасија Данчевска, а во улогата на Магбет – Дејан Битровски.
Музиката за претставата ја направи композиторот Тони Китановски, сценографијата е на Матеа Мијановиќ, а костимите се на Благој Мицевски. Вештерка или алтер его на Лејди Магбет е Бобан Русески, Вештерка или алтер его на Магбет е Сара Цветковска. Во улогите на Вештерки настапуваат Моника Шолевска, Клара Христовска, Стефани Шааршмит, Јоана Благадуша, Микаела-Анџела Глигорова и Ангела Петревска, од Катедрата за танц при универзитетот „Гоце Делечв“. Асистент-репетитор на претставата е Адријана Данчевска.
„Лејди Магбет“ на Рисима Рисимкин се бави со психолошкиот профил на насловниот лик. Тоа е интимна историја, без наративна приказна, слики и скици за дилемите на постоењето.
Претставата е селектирана на престижниот „Шекспир фринге фестивал“ во Верона Италија, каде на 29 август годинава, ќе ја има својата светска премиера во „Театро Камплој“. Во меѓувреме, „Лејди Магбет“ е веќе поканета да гостува на сцените на повеќе театри и фестивали низ земјава.
Рисима Рисимкин е една од водечките кореографки во земјава и деканка на Филмската академија и Катедерата за современ танц при универзитетот „Гоце Делчев“. Во 2022 година, таа имаше историско гостување и претставување на Скопје танцовиот театар на една од најзначаните светски сцени, Националниот театар за современ танц „Шајо“ во Париз, Франција, каде критиката ја оцени нејзината претстава „Идентитети – Историја на еден растегнат сон“ како брилијантна. Рисимкин со свои кореографии, меѓу другото настапува на фестивали и театарски сцени во Њујорк, САД, Хаг, Амастердам и Ротердам, Холандија, Пекинг и Чуанџо, Кина, Лондон, Велика Британија, како и на фестивали и театри низ регионов и во земјава. Рисимкин е оснивач на „Танц фест“ и Скопје танцовиот театар и во изминативе триесетина и повеќе години ја развива домашната современа танцова сцена. Таа е основач на првата наставна програма за современ танц на универзитетско ниво, која ја оформува во соработка со КОДАРТС универзитетот од Холандија и преку која создава нови современи танчери и кореографи кај нас, кои ги пласира на домашната и странска сцена преку продукциите на Интерарт културниот центар, кој од 2019 година го води Матеа Мијановиќ.
Скопје танцовиот театар е првата официјална современа танцова компанија во нашава земја, основана во 2011 година и предводена од кореографката Рисима Рисимкин, како оснивач и уметнички директор. Компанијата во континуитет, активно работи на создавање, промоција и презентација на современата танцова уметност кај нас, како и нејзин пласман на светската танцова сцена. Работата на овој театар промовира нова естетика кај нас и се бави со истражување и продукција во областа на современиот танц. Скопје танцовиот театар, во изминативе десет години има остварено преку 70 продукции. Компанијата настапува на фестивали низ целиот свет, за што добива одлични критики и е препознаен како високо квалитетна компанија на светско ниво.
„Танц фест“ – Скопје е поддржан од Министерството за култура, Амбасадата на Кралството Холандија во Скопје, Амбасадата на САД во Скопје, УГД, Виталија, Бовин и мeдиумските партнери.
