Претставата „Дон Жуан“ од Молиер во режија на Александар Поповски ќе биде премиерно изведена вечерва на сцената на Националниот театар на Унгарија во Будимпешта. Ова е втора претстава во режија на Поповски на сцената на овој театар. Пред две години тој го постави култното дело „Мајсторот и Маргарита“ од Булгаков. Оваа година во Будимпешта се одржува Меѓународната театарската олимпијада (International Theatre Olympics) и оваа премиера е дел од тој голем театарски настан. Во претставата учествуваат уште двајца автори од Македонија, костимографката Миа Поповска и композиторот Марјан Неќак.
Овој текст го поставувам повторно после 17 години од премиерата во Драмскиот театар во Скопје, вели Поповски.
– Театарот во Унгарија е на фантастично високо ниво. Самиот град Будимпешта има околу 200 различни театри. Се надеваме дека оваа претстава ќе гостува во догледно време во Македонија. Драмата „Дон Жуан“ е приказна за човекот затворен помеѓу небото и земјата, којшто постојано се обидува да ја открие тајната на небото. Една од големите теми на Молиер е темата на лицемерието, која звучи како да е напишана за сè она што денес се случува околу нас.
