Во Мобилната галерија на Центарот за современата уметност во Паркот на франкофонијата во Скопје заврши неколкудневната бајка за деца насловена „Планетата Ѕвездалија“. Три дена на планета Ѕвездалија се славеше детството, креативноста и фантазијата. Актерите од Театарот „Златен Елец“ ги водеа децата низ интерактивната претстава работена според Бон-тонот и „Сликовницата на Халки“. Најмалите уживаа и во играта со љубопитното слонче Халки и учеа важни теми како: прифаќање, убаво однесување, другарство, еко-свест и сл.
– 2021 година за „Халкбанк“ помина во знакот на децата и фокусот на нивната едукација за многу важни теми. Нашата корпоративна стратегија и понатаму е насочена кон поддршка на нивната креативност, формалното и неформалното образование, како и подигнување на свеста за животната средина. „Планетата Ѕвездалија“ беше едно убаво претпразнично заокружување на сите наши идеи. Посебно силен и емотивен момент беше настапот на 11-годишниот Хамза Драголовчанин кој ја доби наградата за најдобар расказ на нашиот конкурс „Инклузија – сите деца се исти“. Токму на Ѕвездалија, тој го прочита наградениот расказ за дете со аутизам и борбата со предрасудите на средината. Задоволни сме што силните пораки, важни за целото општество, допираат најпрвин до најмладите, а потоа и до сите останати – вели Маја Наумовска-Савеска од Халкбанк Скопје.
Низ работилниците поминаа многу деца кои ги изработија најубавите лампиони од природни материјали, под менторство на уметникот Доротеј Нешовски, а писателката Ана Голејшка-Џикова им помагаше да ги состават писмата до Дедо Мраз. Посебен интерес имаше за работилницата за цртање колачи со дизајнерката Емилија Ќипроска, брендот 4U и нивната иновативна линија на функционални колачи. Учениците од средното уметничко училиште „Лазар Личеноски“ беа едукатори во делот за цртежи и честитки и најубавата изложба на отворено. Организатор на „Планетата Ѕвездалија“ беше „Халкбанк“ и нивниот Халки.