Во живописниот амбиент под ѕидините на древниот Диоклецијанов град, Сплит, писателот Томислав Османли вчера беше претставен пред хрватската јавност. Неговото творештво го претстави книжевната критичарка и преведувачка Патриција Хорват.
Османли за умно.мк споделува импресии.
-Настанот помина извонредно. Говорев за рецепцијата на мојата книга јудео-балкански новели и раскази „Светилка за Ханука” и за мотивите на мојот награден роман „Дваесет и првиот”, чие хрватското издание го претставив пред бројната и квалификувана книжевна публика. Беше тоа една динамично и занимливо водена промоција на двајца автори со слични творечки домени. Одговарав на серија прашања за моето прозно, сценаристичко драмско и теоретско творештво во доменот на стрипот – вели Османли.
На промоцијата учествуваше и Ивица Иванишевиќ, кој сподели дека одамна е запознаен со неговата работа на стрипот, а за подарок Османли доби книга за стрип на хрватскиот автор, која е прва книга за дела на деветтата уметност објавена во Хрватска.
Вечерта посветена на Османли беше во рамките на проектот „Reading Balkans“ во рамките на „Креативна Европа“.
