Одлична изведба на претставата „Не ме чекај“ на театар од Нант, Франција, насмеани дечиња, инспиративни говори го красеа отворањето на 3. Интернационален фестивал за детски театар „Игор Маџиров“ синоќа на сцената на Театарот за деца и младинци. Присутните ги поздрави претседателката Гордана Силјановска – Давкова, која е покровител на фестивалот. Мотото на фестивалот годинава е „Се’ e твое“.
Фестивалската програма продолжува денеска. Во 19.30 часот на програмата е „Палешка“ на Куклениот театар Љубљана од Словенија, наменета за деца над 3 години. Претставата ја игра и е во режија на Маја Куншиќ.
Сцена од „Палешка“
Се’ почнува со едно семе и желба за нештото да порасне. Со малку грижа и внимание, набрзо семето изртува од земјата и расте цвет кој цути. Од цвеќето, едно ситно суштество доаѓа на свет кое е премногу љубопитно. Едно суштество не поголемо од палец. Нејзиниот мал раст, во секој случај, го чини светот не помалку груб и за Палешка. Набргу, девојчето доживува низа од случки кои ја тераат да го преиспита нејзиниот контакт со целиот свет.
Утрово во Театар Комедија гостуваше Краљевачкиот театар од Краљево, Србија, а во 13 часот ќе следува матерклас на режисерот Јакуб Максимов од Чешка. Во 17 часот, во Македонскиот народен театар ќе следува панел-дискусија што ќе ја водат режисерите Драгана Милошевски-Попова и Игор Ивковиќ.
