Фотографот Роберт Јанкулоски во соработка со уметницата Моника Мотеска и нивниот проектот „Landscape experience“ ќе ја претставуваат Македонија на 59. Венециско биенале за уметност што ќе се одржи од 23 април до 27 ноември, соопшти Министерството за култура. Проектот е кандидат на Националната галерија на Македонија, куратор е Ана Франговска, историчарка на уметност, а комесар – Дита Старова-Ќерими, директорка на НГМ. Во конкуренција биле вкупно пет проекти: „Божествена пародија“ на Страхил Петровски, канадидат на Музеј на Град Скопје, „Сите изгубени гласови“ на Филип Јовановски, на Младинскиот културен центар од Скопје и „Горчлив шеќер“ на Ѓорѓе Јовановиќ кандидат на Музејот на современата уметност. Една пријавите не била разгледувана откако подносителот се повлекол од конкурсот.

Во образложението на стручната комисија при Министерството за култура пишува дека проектот „Landscape experience“ низ јукстапозиции поставува нови пејзажи, реални, а имагинативни; локални и национални, а сепак универзално препознатливи.

– Нивните сублимирани сцени, објекти, видеа и просторна инсталација го сугерира односот тело-природа, човек-технологии, човекот како несовршено суштество и негова когнитивна симбиоза со останатиот жив свет и околина. Низ квалитетен материјал и портфолио, авторот и кураторката го развиваат и докрај го објаснуваат проектот како соодветен одговор на темата на Биеналето – „Млеко од соништата“ – соопшти Министерството.

УСЛОВИ ЗА ПРЕЗЕМАЊЕ
Текстовите, фотографиите и останатите материјали што ги објавува Умно.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Умно.мк.