„Недела на современ полски филм“ од вечерва до петок ќе се одржи во Центарот за култура Битола. Проекциите почнуваат во 19.30 часот. Организатори се полската амбасада во земјава и Кинотеката на Македонија.
Ревијата почнува вечерва со „Траги“ во режија на Агњешка Холанд. Улогите ги толкуваат: Агњешка Мандат, Виктор Жборовски, Јакуб Гершал. Приказната е за Душејко, ексцентрична пензионирана градежна инженерка, астролог и вегетаријанка, која живее во мало планинско село на чешко-полската граница. Еден ден нејзините сакани кучиња исчезнуваат и Душејко не може никаде да ги најде. Неколку месеци подоцна, во една снежна ноќ, интровертниот сосед на Душејко налетува на мртвото тело на ловокрадец што живее во близина. Неговата смрт е мистериозна. Единствените траги околу телото се оние од копитата на елените…
На програмата утревечер е „Лице“ во режија на Малгоржата Шумовска, по сецанарио на Михал Енглерт и Шумовска. Улогите ги толкуваат Матеуш Кошчукевич, Агњешка Подшадлик, Малгоржата Горол. Задутре ќе биде прикажан „Соединетите држави на љубовта“ по сценарио и во режија на Томаш Василевски. Играат: Јулија Кијовска, Нагдалена Челецка, Дорота Колак, Марта Нерадкиевич.
Филмовите ќе бидат прикажани во малата сала во Ценатарот за култура, влезот е бесплатен. Задолжително е почитување на ковид-мерките, прикажување на сертификат за вакцинација, носење маска и држење дистанца.