Во Чифте амам во Старата скопска чаршија денеска во 18 часот ќе се одржи разговор со уметникот Дриант Зенели, по повод неговата тековна изложба „Трилогија: Под површината има уште една површина“. Присутните ќе можат да се запознаат со творечкиот развој на овој меѓународно афирмиран автор, неговите уметнички концепти, интереси, истражувања и реализации.
Воедно, тој ќе зборува и за неговиот најнов филм, снимен во Поштата во Скопје, дел од „Трилогијата: Животните: Си било некогаш… во денешно време“, насловено „Светулката продолжува да свети, змијата продолжува да расте“ (2022). Филмот е изведен во соработка со Националната галерија на Македонија и Машинскиот факултет од Скопје. Филмот е нарачан од „Манифеста 14“, а продуциран од Фондацијата Between Art Film.
