„Крал Лир“, од Вилијам Шекспир, според адаптација на текст и режија на Џон Блондел е светска премиерна изведба направена специјално за фестивалот „Охридско лето“, во продукција на Македонија, Ерменија, Финска и САД. Претставата е режирана по импресии од сцената на предворјето на црквата Света Софија, а премиерата е вечерва во 21 часот
Претставата испреплетува приказни за две семејства. Во едното, Лир го дели своето кралство меѓу двете ќерки кои му ласкаат а ја прогонуваат најмладата ќерка која искрено го сака. Во другата приказна, војводата од Глостер му верува на синот кој е предавник но се сомнева во неговата лојалност. Приказните на крајот се спојуваат во една со премногу болка.
Преку играта на актерската екипа се прикажуваат живописни слики и визуелно раскажување приказни, раскажани на јазикот на Шекспир. Изведбата евоцира изгубени светови и минати времиња, атмосфери преплавени со антички ритуали, духови и соништа, едноставно раскажување и оригинална музика.
Основан во 1991 година, Lit Moon Theatre Company е колектив на театарски уметници со седиште во Санта Барбара. Неговата мисија е да понуди театарски искуства кои го прошируваат и продлабочуваат разбирањето на светскиот театар и културните традиции и промовираат и инспирираат меѓукултурно разбирање преку театарска изведба во живо. Од 1992 година, Lit Moon создаде 45 нови театарски проекти, продуцира тринаесет меѓународни театарски фестивали, доби десетици награди за своите уметници.
Џон е добитник на 13 независни театарски награди а во 2003 година добитник е на награда за факултетско истражување од колеџот Вестмонд, во 2013 е именуван за учител на годината и „локален херој“за неговата „неуморна посветеност“ во меѓународната театарска заедница. До денес, Џон има режирано над 100 продукции во САД, Европа и Азија.
Сценографијата и костимите се на Благој Мицевски, музиката – Џејмс Конели, куклите и фотографите се на Јулија Духовни
Улогите ги толкуваат: Ирвин Апел, Брајан Харвел, Џејмс Мек Карти, Нина Салинен, Мајкл Бернард, Метју Тавианини, Вардан Мкрчјан, Мичел Томас и Даен Хенри.
Претставата не се препорачува за лица под 13-годишна возраст
