Учесници од над 40 земји ќе дојдат во Битола за да бидат дел од трката „Трчај бе“. Тоа само покажува колку е популарен настанот. Горди сме што трката „Трчај бе“ ја зајакнува позицијата на Битола како центар за спорт и култура. Ги повикуваме сите што сè уште не се пријавиле да го направат тоа денес и да ни се придружат во славењето на трчањето во Битола и она што првите кинематографери браќата Манаки го направиле и за нашиот град и за светот – истакнува Никола Димитровски, иницијатор на трката.
Трката „Трчај бе со Алпско“ ќе биде на 22 септември, а истиот викенд, односно на 21 септември започнува и 45. „Браќа Манаки“. Денес е последниот ден за пријави, па сите оние кои сè уште размислуваат, не ја пропуштајте можноста да бидете дел од оваа убава тркачка приказна.
Градот ќе биде место на средба на ѕвездите кинематографери од светот, но и на вљубениците во трчањето, па токму од таа причина, мотото на овогодинешното издание е „Филм ми е да трчам“. Трчај бе овој пат ќе трча по својот заслужен црвен килим, во пет трки на 5, 10 и 21км, со тоа што годинешниот полумаратон е и Национално првенство што го ораганизираат домаќините со Атлетската федерација на Македонија.
Голем број компании веќе неколку години ја имаат ставено трката во своите календари како дел од тим билдинг активностите. Оваа трка годинава покажува дека е повеќе од настан – тоа е платформа која го обединува спортот, културата и тимскиот дух.
– Секое издание на „Трчај бе“ ни носи посебна енергија, но оваа година е навистина посебна. Со слоганот „Филм ми е да трчам“, ја поврзуваме трката со Фестивалот на филмската камера „Браќа Манаки“ што го прави настанот уникатен во својата форма. Не е само спортски предизвик, туку и културен симбол за градот. Возбудени сме што можеме да ги обединиме љубителите на трчањето и филмските ентузијасти на едно место, и што овој настан станува дел од календарот како настан кој не се пропушта во нивните тим билдинг активности – истакнува Димитровски.
За комплетната креативна концепција на трката е задолжена Академијата за графички дизајн Monday Learning. Ова е повеќегодишна соработка која им дава шанса на студентите целосно да се вклучат во процесот на креирање на визуалите и решенијата за трката. Нивниот труд секоја година го претставува организаторот на изложба, каде што тие можат да го покажат своето креативно портфолио и да добијат вредни искуства.
