Објавен е конкурсот за поетската награда „Млада Струга“ 2024, за најдобра необјавена поетска збирка од млад автор-дебитант што го распиша фестивалот „Струшки вечери на поезијата“ во соработка со Europe House Струга и со поддршка на Делегацијата на Европската Унија во нашата земја. Конкурсот ќе биде отвирен заклучно со 3 јуни 2024 година, кога сите пријави и необјавени поетски збирки треба да пристигнат на поштенската адреса на Струшките вечери на поезијата
Според пропозициите, авторот не смее да биде помлад од 18 години, односно постар од 30 години заклучно со денот на крајниот рок на конкурсот и мора да биде македонски државјанин. На конкурсот пријава може да поднесе исклучиво авторот.
Пријавените необјавени поетски збирки ќе ги разгледува тричлена комисија која што најдоцна до 1 јули до Управниот одбор на фестивалот треба да достави единствен предлог за добитник на наградата. Името на добитникот ќе биде објавено на 3 јули.
Наградата вклучува плакета, паричен износ и објавување на печатена публикација во склоп на изданијата на СВП.
Добитникот на наградата ќе биде поканет да учествува на изданието на „Струшките вечери на поезијата“ во Струга кон крајот на август гоинава, каде и ќе му биде врачена наградата на манифестацијата „Мостови“. „Млада Струга“ е возобновена поетска награда која што во минатото се избираше на Конкурс што го распишуваше Книжевната младина на Македонија.
Интегралниот текст на Конкурсот со критериумите и условите може да го видите на ликот и на веб-страницата на „Струшки вечери на поезијата“.
