Во рамките на фестивалот Охридско лето, во црквата „Св. Софија“ вечерва во 21 часот концерт ќе одржат Доминик Вагнер, контрабас и Софија Палуровиќ, пијано. На програмата се дела од Бетовен, Малер, Ботесини, Мартин и од Пјацола.
Доминик Вагнер (1997, Виена) е посветен на идеалот да го извади контрабасот од сенката на виолончелото и да ги прикаже индивидуалните можности на овој најдлабок инструмент во групата гудачки инструменти. Успева во неговата намера не само со неговото сценско присуство, туку и со импресивната виртуозност, лирска мелодичност и со постојаните напори да го прошири репертоарот за контрабас преку нарачки на нови дела, транскрипции на постоечки композиции, истражувања во потрага по ретки дела. Заедно со неговиот татко, композиторот Волфрам Вагнер транскрибираат дел од концертот за виолончело од Дворжак во концертна композиција за контрабас која својата премиера ја имаше минатата година во Луцерн. Иако, релативно млад, Доминик Вагнер е стипендист на фондацијата на Ан Софи Мутер, добитник е на наградата „Ехо“ Класик, а во 2022 година беше прогласен за млад талент на годината од страна на Опус Класик. Победник е на бројни натпревари за контрабас, како натпреварот за соло басисти на фондацијата „Брадетич“, Меѓународниот натпревар на АРД во Минхен, добитник е на наградата „Фани Менделсон“ како и на награда на Евровизискиот натпревар за млади класични музичари. Студирал на Универзитетот за изведувачки уметности во Виена во класата на професорите Јозеф Нидерхамер и Вернер Флејшман од 2009 до 2015 година, а од 2015-2022 со проф. Дорин Марк на Високата школа за музика во Нирнберг. Од 2023 година е студент на специјалната програма на Академијата Конберг, а редовно одржува мајсторски курсеви во Европа и САД. Од 2023 година е професор по контрабас на Високата школа за музика во Вурцбург.
Софија Палуровиќ почнува да учи пијано на 8 годишна возраст со Татјана Вукмановиќ во Нови Сад, Србија. Откако го завршува образованието во специјализираното музичко училиште „Исидор Бајиќ“ во Нови Сад, заминува во Виена каде студира на Универзитетот за музика и изведувачки уметности во класата на Стефан Владар, а магистрира во класата на проф. Јасминка Станчул. За време на студиите бележи успеси на национални и меѓународни натпревари: прва награда на Меѓународниот натпревар за пијанисти во Белград, прва награда на натпреварот „Пијано таленти“ во Милано (Италија) и прва награда на натпреварот „Даворин Јенко“ во Белград. Дополнително, освојува награди како камерен музичар со триото „Спирито динамико“ (флејта, виолина и пијано). Во изминатите години настапува во престижни концертни сали во Европа како „Брукнер хаус“во Линц, „Бетовен хаус“ во Бон, но и во Градската куќа во Нови Сад. Вклучена е во разни мултидисциплинарни проекти како премиерата на верзијата на „Човекот од Мидиан“ за две пијана и современ танц. Софија се надградува учествувајќи на семинари кај познати пијанисти и педагози како Анџела Хјуит, Жак Рувие, Иан Џонс и др.
