На Летната сцена „Славиша Кајевски“ утревечер во 21 часот Националниот џез оркестар ќе настапи со концерт со хитови на легендарните „Битлси“. Веќе на 8 октомври на сцената на Македонскиот народен театар (МНТ), оркестарот ќе одржи концерт со студентите од Факултетот за музичка уметност во Скопје и Џез академијата во Штип.
Хитовите на „Битлси“, ќе прозвучат на сосема нов начин на концертот на Националниот џез оркестар. Нашите џезери ветуваат оригинална интерпретација и незаборавна вечер со композиции на ливерпулската четворка која ја смени рокенрол музичката историја.
Како солисти на концертот ќе ги слушнеме нашите истакнати музичари: Кирил Кузманов, Славко Георгиев, Трајче Велков, Виктор Филиповски, Сашко Николовски и Гордан Спасовски под диригенство на маестро Џијан Емин.
Концертот закажан на 8 октомври во 20 часот во МНТ ќе ги спои искуството на професионалните музичари и талентот на студентите. Искусните и младите џезери најавуваат динамична програма, исполнета со разнородни џез композиции и иновативни аранжмани. Ова вечер ќе биде одлична можност јавноста да ужива во креативноста и свежината на новите таленти, како и да ги поддржи во нивниот музички развој.
Во МНТ минатата недела беше отворена летната сцена „Славиша Кајевски“ која ги сплоти публиката, актерите, режисерите, музичарите и сите уметници, на едно убаво место – плато/летната тераса покрај течението на реката Вардар. Ако утревечер времето не дозволи концерт на отворено, концертот за „Битлси“ ќе се одржи на затворена сцена во МНТ.
