Филмот „Набљудување“ на режисерот Јанез Бургер, копродукција меѓу Словенија, Италија, Хрватска и Македонија синоќа премиерно беше прикажан на Фестивалот на европски филм „Синедејс“ во Младинскиот културен центар во Скопје. Филмот е инспириран од вистински настан кој се случил во Словенија, а претставува повик до секој поединец за надминување на пасивноста која денес е длабоко вкоренета во современото општество – на глобално ниво, повик за враќање на она елементарно чувство на емпатија, разбирање и помош на друго човечко суштество.
Продуценти на „Набљудување“ се Миха Чернец и Јожко Рутар од продуцентската куќа „Старагара“ од Словенија, а копродуценти се Борис Т. Матиќ („Пропелер филм“, Хрватска), Игор Принчич („Трансмедиа“, Италија) и Роберт Јазаџиски („Кавал филм“, Македонија). Визуелните ефекти за филмот ги изработи Филмското студио за визуелни ефекти и анимација ФХ3Х од Скопје, а дизајнер на звук од Македонија е Игор Поповски.
Интернационалната премиера на филмот беше одржана на реномираниот филмски фестивал во Естонија, Tallinn Black Nights Film Festival, во 2023 година. Проектот е поддржан од Словенечкиот филмски центар, Хрватскиот аудиовизуелен центар, РТВ Словенија, Студио Виба Филм, македонската Агенција за филм, Креативна Европа Медиа (Creative Europa Media), регионалниот филмски фонд ФВГ од Италија (Friuli Venezia Giulia Film Commission) и Министерството за култура на Италија.
Филмот е добитник на наградите „Весна” за најдобра женска улога, најдобар продукциски дизајн и најдобар звук, а беше номиниран и за наградите најдобар филм, најдобра режија и сценарио на фестивалот на Словенечки филм во Порторож во 2023 година. Наградата за најдобар звук ја делат Јулиј Зорник и нашиот Игор Поповски. Филмот, исто така, има три номинации на филмскиот фестивал во Трст – Италија, во категориите: најдобар филм од публиката, од жирито и од CineEuropa. На интернационалниот филмски фестивал во Софија, филмот е номиниран за наградата најдобар филм во програмата Balkan competition.
