На штандот на ПНВ Публикации на Саемот на книгата во Скопје денеска во 12 часот ќе се одржи средба со Александра Јуруковска, авторка на книгата „Две минути и четириесет реда“. Книгата содржи осврти, критики и рецензии пишувани во изминатите петнаесетина години.

Се состои од два дела. „Две минути“ содржи избор текстови за радиоосврти и радиопретставувања пишувани и емитувани на Македонското радио – Радио Скопје од 2003 до 2008 година, во рамките на авторската рубрика „Книга-фаворит“. Текстовите поместени во вториот дел „Четириесет реда“, се новинска критика. Дел од нив се објавувани во дневниот весник „Дневник“, а другите во специјализирани списанија за литература и култура, веб-страници и магазини. Неколку текста се напишани како промотивна реч за одредени автори, книги или зборници и манифестации.

Текстовите ги следат стилските обележја на новинската критика, на згуснатиот новинарски израз, пишувани се во јасен стил и на разбирлив јазик, и наменети се за поширока публика.

Во основа, секој од овие текстови ја следи линијата на пишување критика за специфичен медиум – за радио или за весник, односно, за специјализирани книжевни списанија или веб-страници. Оттука, нивното обединување во книга е следење на одреден континуитет во пишувањето текстови за критиката, што важи за не многу популарен жанр кај нас, а во неа, пак, уште послабо застапениот поим на новинска или радиокритика.

УСЛОВИ ЗА ПРЕЗЕМАЊЕ
Текстовите, фотографиите и останатите материјали што ги објавува Умно.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Умно.мк.