Десетмина уметници учествуваат на 38. Интернационална ликовна колонија „Дебрца“ што се одржува во селото Белчишта, Охридско. Во чест на основоположникот на колонијата, неодамна починатиот педагог и ликовен уметник, Ѓорѓија Целески, на колонијата ќе творат Јордан Манасиески од Охрид, Ставре Димитров-Стадим, Запро Запров, Војдан Запров и Натали Николоска од Скопје, Андреј Антевски од Куманово, Леетив Намдаг Жанчивин – мистер Ли од Монголија, Петар Бељашки и Велислава Пожгорска од Бугарија и Светлана Солодова од Русија.
Според градоначалникот на Општина Дебрца, Зоран Ногачески, традицијата од 38 години покажуваат дека ликовната колонија е еден од највисоките културни дострели на Белчишта.
– Основоположниците на колонијата пред 40 тина години можеби и самите не биле свесни дека создале културна рожба која денес е блескаво културно наследство и уметничките дела создадени на Ликовната колонија не се само наследство на Дебрца и Македонија, туку се светско културно наследство – вели Николовски.
Уметничката колонија има фонд со повеќе од 700 уметнички дела врвни уметници од Македонија и од светот.
