Македонија годинава одбележува половина век од отворањето на Лекторатот по македонски јазик во Париз, Франција. Отворен во Националниот институт за ориентални јазици и цивилизации (ИНАЛКО) во Париз, ова е првиот лекторат по македонски јазик отворен надвор од некогашната југословенска држава. Во текот на неговото 50-годишно непрекинато работење и развивање, овој Лекторат не само што е средиште на македонистиката во Франција и централна точка на македонско-француските академски и културни врски, туку е и клучен центар за афирмацијата на македонскиот јазик, литература и култура воопшто во еден дел на Европа.
Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје заедно со ИНАЛКО го чествува значајниот јубилеј, со заложби за натамошните перспективи за развој на македонистиката на овој реномиран европски висообразовен центар.
– Исправени сме пред историска обврска и одговорност – да го вреднуваме она што е историја и сегашност на македонистиката во Франција и да оствариме влог во нејзината иднина. Во децениите наназад, постигнато е многу. Денес, македонскиот јазик на ИНАЛКО се изучува како главен предмет, на сите циклуси академски студии – од лиценца до докторат. Тука е и првата професорска катедра за македонистички студии на странска високообразовна институција. Од минатата година, македонистиката има статус на ретка научна дисциплина во Франција и е заштитена. Но, не треба и не смее да се запре тука – вели директорката на Меѓународниот семинар, проф. д-р Весна Мојсова-Чепишевска.
Таа истакнува дека оствареното во изминатите пет децении, не ќе било можно без влогот на сите посветеници на македонистиката, сите досегашни лектори, од првиот, проф. д-р Алекса Попоски до актуелниот, м-р Ѓоко Здравески, но и кадарот на ИНАЛКО, при што за изминативе две децении особено важна е посветеноста на проф. д-р Фроса Пејоска-Бушро, која раководи со студиите по македонски јазик, литература и култура.
– Се надеваме дека и во оваа јубилејна година, македонскиот збор силно ќе одекне во Париз, преку научни согледби, резултати од истражувања, заеднички иницијативи и нови проекти во периодот што следи – вели Мојсова-Чепишевска.
