Македонија и Грција денеска го направија првиот формален чекор во културната соработка меѓу двете земји со меморандум за соработка меѓу Министерството за култура и Европскиот центар за византиски и поствизантиски споменици. Документот го потпишаа министерката за култура, Ирена Стефоска и претседателката на Управниот одбор на Центарот, Наталиа Пулу.

– Се радувам за она што го носи иднината. На сите ви посакувам продуктивна и плодна работа заедно – рече Стефоска.

Пулу изрази задоволство и надеж дека соработката која почнува во доменот на конзервацијата и реставрацијата ќе прерасне и во соработка на научно поле, издавање публикации и популаризација на културното наследство. Меморандумот претставува основа за соработка меѓу нашите надлежни институции за заштита на културното наследство и Европскиот центар, за размена на експерти, како и за обука на кадар за конзервација и реставрација.

Двете земји ќе соработуваат и на развој на проекти и нивно промовирање во европските институции, како и за заедничко аплицирање во фондовите на Европската Унија. Потпишувањето на меморандумот беше иницирано во рамките на неодамнешната посета на грчка делегација кога беше потврдена отвореноста за конкретна соработка меѓу двете земји.

 

УСЛОВИ ЗА ПРЕЗЕМАЊЕ
Текстовите, фотографиите и останатите материјали што ги објавува Умно.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Умно.мк.